اعلان رسمي موعد ذروة انتشار فيروس كورونا في مصر | احصائيات فيروس كورونا في مصر

+ حجم الخط -




ايه هي فترة الذروة لانتشار فيروس كورونا في مصر ؟ 
وهل الذروة دي ذروة في عدد الحالات ولا الوفيات ولا ايه ؟
هتقعد قد ايه و امتي نقول اننا عدينا فترة الذروة  و المفروض نعمل فيها ايه !! تعالوا نفهم طبقاً للتصريحات الرسمية الصادرة عن الحكومة المصرية و متحدثي وزارة الصحه متوقع اننا في خلال الاسبوعين الجايين دول هنوصل الى ذروة انتشار فيروس كورونا وتفشي فيروس كورونا في مصر ( شهر يونيو 2020 ) مبدئياً كل الدول قبل وصولها لمرحلة الذروة كان بيطلع تصريحات رسمية من المسئولين عند اعلانها بتجمع بين التحذير الشديد والحزن و المواساة  ( بعض قادة الدول العظمي وصفوها بالايام السوداء في خطابات رسمية وبكي منهم كرئيس وزراء بريطانيا ) و كان دايماً بيكون معاها اجراءات اكثر حزماً و صرامة من الحكومات فيما يخص اجراءات العزل و منع التجول و الحظر ( ماعرفش حقيقة الاسباب الي بتخلي الحكومة المصرية خطابها و قراراتها الي الان مطمئن للناس و في اتجاه معاكس للواقع تماما" ونتمنا يكونوا شايفين الصورة كما ينبغي ان تري ) فترة الذروة هي فترة بيتضاعف فيها اعداد الحالات بشكل كبير و جنوني و بالتبعية حالات الوفاة يوميا"  هنا مش بنتكلم علي الحالات المعلنة او المكتشفة من قبل الحكومة بس لأ علي عدد الاصابات و الحالات الحقيقية ( المكتشف بيكون نسبتة ١٠٪؜ - ٤٠ ٪؜ تقريباً ) ودي احصائيات عالمية  ، كمان الزياده دي بتكون بشكل تصاعدي مستمر مش متذبذب  يوميا" في الفترة دي هتبدأ الدايره تضيق و هتلاقي فيها اصابات لناس كتير قريبين ليك و في دوائر معرفتك  للاسف دا كمان بيعني امتلاء كل الاماكن في المستشفيات و عدم وجود سراير لمرضي جدد لأن المنظومة الصحية ليها سعة استيعابية  وده حصل كمان بدليل وجود العزل المنزلي الآن لمرضي كتير  مريض العناية محتاج سرير و طقم طبي و اجهزه ، انتشار الفيروس مش هيكون الي ما لا نهاية ، بيفضل يزيد و ينتشر لنقطه معينة (نقطة الذروة ) و بعدين تبدأ اعداد الحالات في التراجع و الاوضاع تستقر بشكل كبير في حالة الالتزام و هنا يمكن اعلان انتهاء حاله الذروة  فيه بلاد عدت مرحلة الذروة بشكل احسن من غيرها زي المقارنة بين الصين و ايطاليا مثلا و الاختلاف بينهم كان في التزام الشعب بدري و الاجراءات الاستباقية الي تم أخذها من الحكومية الصينية بعكس ايطاليا الي اتاخرت كتير و دفعت التمن حالات و ووفيات مضاعفة 


طيب احنا المفروض ك مواطنين نعمل ايه في الفترة دي ؟

-اولا نبقي مستعدين و عارفين انها اخطر مرحلة من انتشار الفيروس و بالتالي يكون فيه حرص شديد و تحمل مسئولية -

- ضرورة الالتزام بقواعد العزل المنزلي وعدم مغادرة البيت الا للضروريات سواء فيه حظر او مفيش اي حاجه مش ضرورية ماتنزلش عشانها 
-منع التجمعات العائلية و تجمع الاصحاب لأن بنسبه كبيره هيكون فيه حد فيهم مصاب و هيكون بؤرة لانتشار المرض في المجموعة 
 -الكمامة و غسل اليدين المتكرر بالمياة و الصابون و التباعد الاجتماعي عامة و في الاماكن الي فيها ازدحام و تجمعات خاصة ( يفضل تجنبها اذا امكن ) 
 -الحرص الشديد بالنسبة للوظايف الي شغلها مكمل زي البنوك و المواقع الانشائية و الهايبر و المصالح الحكومية و غيرها 

 -الدعم المعنوي و المادي الكامل للاطباء و الصيادلة و الممرضات و كل الاطقم الطبية عشان الفترة دي هتكون الاصعب و هتحتاج منهم جهد مضاعف

 -عدم الهلع و الخوف لأنها بتأثر الي المناعة ، بقائك و الراحة في بيتك بنسبة كبيره اوي بيساوي نجاتك في اغلب الحالات -يجب ان يتوقف الضغط من رجال الاعمال و القطاع الخاص علي الحكومة و علي الناس لأن الرجوع الكامل في الفترة دي انتحار و ماحصلش في اي مكان في العالم انهم رجعوا وقت الذروة 

-التوعية .. التوعية .. التوعية .. فعلا صوت واحد بيفرق  لو شوفتوا حد مش عارف او مش فاهم عرفوه و فهموه كل الناس الي صوتها مسموع لازم تحذر و تتكلم و تكون مثال لغيرها عشان نعدي الفترة دي بسلام و فكروا انتوا عايزين فترة الذروة تعدي و احنا شكلنا عامل ازاي ؟ و احنا مطمئنين علي اهالينا ولا و احنا قلقانين او موجوعين عليهم ؟ و احنا قاعدين آمنين في بيتنا ولا قاعدين بنشوف اي واسطه تشوف لنا سرير في مستشفي و مش لاقيين ؟! يا ريت نساعد ان الكلام دا يوصل لكل الناس و يا ريت نكون كلنا قد المسئولية .. و ربنا يعديها علي خير ان شاء الله .. ظني ف الله كبير 🙏🙏 #خليك_في_البيت

كتابة تعليق